Morfologi

Entri serak tu bekaul enggau kus Morfologi Jaku Iban.

 

Nitihka Padang anak Luna enggau Chemaline anak Osup (2011), morfologi sesebengkah bansa jaku nya jalai nempa leka jaku. Morfologi jaku Iban nya bidang penemu ti betungkapkan struktur tukuh enggau raban jaku. Iya endang siti bidang ti kompleks. Morfologi mega tau dipeda nyadika jematan ti besabungka kaul sintaksis enggau fonologi jaku. Morfologi dikumbai bekaul enggau pansik munyi sebut jaku. Kebuah pia laban iya endang ngemeranka pansik pasal gaya leka jaku ti datai ari munyi sebut. Iya bekaul enggau pansik sintaksis laban ari leka jaku iya tau didijir nyadi frasa, klausa enggau ayat ti mai reti. 

 

Pansik struktur leka jaku mungkur munyi sebut tauka lambang tulis ti nyadi jaku ti bisi ngundan reti. Tukuh jaku nya gaya unit jalai jaku, sekalika iya betukuh tunggal tauka datai ari proses meri penambah, beturuka leka jaku tauka proses jaku betandu. Beripihka jaku ngagai raban jaku nya proses nijirka leka jaku ngagai raban ti bisi leman penyemaka lalu tau dibagi nitihka fungsi dalam raban leka jaku ti sama. Morfem nya unit ti pengabis mit dalam jaku ti befungsi gramatis dalam jalai jaku. Leka jaku nya tukuh ti mit tang ngundan reti ti menyana lalu ulih bediri kediri.

 

Nitihka Nik Safiah Karim et. al. (2009) dalam bup Tatabahasa Dewan, morfologi iya nya siti bidang penemu jaku ti mansik leka jaku ari sukut struktur, tukuh enggau kelas leka jaku. Struktur leka jaku iya nya tukuh munyi tauka lambang ti nyadi unit jaku ti manggum reti. Nangkanka nya, tukuh jaku iya nya gaya unit jalai jaku, sekali ka betukuh tunggal tauka asil ari proses meri penambah, beturuka jaku enggau betanduka jaku.