Semantik

Siti ari kus ke bisi dipelajar aku ba IPG Rajang ditu mega iya nya Semantik. Dalam ku tu, kami bisi belajarka topik Jaku Dalam.

Jaku dalam iya nya jaku ti mandingka siti-siti pekara. Reti iya enda sebaka enggau ti ditulis 

tauka disebut. Nitihka penemu Janang anak Ensiring enggau Dr. Robert Menua Saleh dalam bup Jaku Dalam, jaku dalam tu ngeraup empat bengkah bagi jaku. Sida nya jaku sempama, jaku sema, jaku silup enggau jaku dalam rama. Jaku dalam enda beterus terang, tang belalai, besema, besilup, besuruk tauka 

bentelah. Utai ti dipadahka ngena jaku nya nyau kediri reti ari leka jaku nya 

empu. Enti kitai enda nemu lalai jaku nya, dia kitai tau enda nemu reti utai ti dikejakuka iya. Nya alai, jaku dalam tu, iya nya jaku ti mar diperetika.

 

Bansa Jaku Dalam

Jaku sempama iya nya pemanah runding terebai tauka dikumbai penemu siku mensia, ke ulih ari pemandai orang mayuh. Sempama nya pengelandik dikena mensia bejaku, ngasaika pengamat, pemetul kitai ngereja pengawa, tauka dikena ngembar sekalika ngayanka jalai ke disadang kitai, tauka dikena mensia ngereja pengawa, bejalaika pasal ajar enggau tangkan, ke dikena beruruska ulah enggau pendiau mensia, ke ngatur pengidup raban bansa diri. Pekara ti disempamaka nya nyengkaum pengasai ati mensia, gaya pengidup, pendiau enggau ulah sida, gaya rampa menua enggau utai ke nyadi sekalika idup ba kandang nya, ke bekelingi pendiau enggau Iban ke dulu kelia enggau semua peturun sida iya nyentuk ke seharitu.

Jaku sema ukai jaku sempama tulin. Iya semina jaku dikena nyemaka gaya utai ke deka diterangka kitai ngagai peninga, ngambika sida iya jampat meretika kuing beriya ke dipadahka kitai ngagai sida.jaku sema mega selalu nyemetak nyebut gaya utai ke endur kitai nunjukka sema kitai nya enggau nadai belalai, nadai bentelah. Tang kebuah jaku sema tau dikumbai jaku dalam, laban dalam iya dikena nyema iya mega mai reti kediri ke dalam sereta menyana. Jaku sema bepun enggau leka jaku baka, asai  enggau munyi. 

 

Chunto
Jaku Sema	Reti
Baka gerama ke ngirit sepit.	Nerangka pengelubah mensia ngereja pengawa.
Baka lauk mayuh kuah.	Nusi pemula kelalu mayuh ari pengamat.
Asai ke nganti indai pulai nebu.	Nerangka gaya ulah tauka pendiau mensia ke keras deka ninga berita manah ke sigi lama udah dianti.
Asai ke diau di baruh punggu.	Nerangka orang ti diau dalam penusah, seruran nangika tauka rawanka penusah tau nyadi.
Munyi ke nyiuhka ai.	Nyemaka munyi pemansut tai orang ti bira chirit.

 

Nyadi jaku silup suah disebut jaku kelaung. Jaku silup bisi belalai tauka bentelah. Utai ke endur nyemaka nya ulih dipeda, didinga tauka diasaika. Jaku silup selalu enda berambai, enda betimbal, kadang-kadang ka seleka dua aja. Leka jaku nya selalu mudah ditemu reti enti kitai nyalinka iya seleka-seleka tauka sepemanjai luntang iya.

Chunto
Jaku silup	Reti
Ka ngabas rau	Deka berikan ba sungai.
Nekuka lengan	Deka makai.
Nadai agi puak engkubung	Lapar.
Ngabas tampun	Nguji penyamai enggau pemisa tuak.

 

Nangkanka nya, siti agi bansa jaku dalam iya nya jaku simbol. Kitai Iban endang kaya enggau jaku simbol baka pesindang, pelepa, temuku tali, tambai, ruding enggau terantang begau.

Jaku Simbol	Reti	Situasyen tauka Jalai Ngena
Pesindang	i. Repik kayu diselit (baka gaya urup X) ba abi tibak ba batang kayu tauka ba kayu ti dientakka ba tanah. ii. Tuju iya dikena nanda pelimpang jalai peti tauka endur mali dipasuk tauka ditengah sereta nanda ambu pasal temuda.	Apai Jang ngaga pesindang ba pun engkabang ti deka ditebang ke ramu ngambika orang bukai enda nebang kayu nya sebarang.
Pelepa	i. Daun idup, pua kumbu enggau ti bukai digitangka manang ba pala pintu orang ke udah dipelianka, dikena madahka bilik nya mali dipasuk temuai dalam kandang pemali. ii. Daun kayu, akar, kayu ti diselitka ba abi tibak enggau ti bukai ke tanda rara, tagang tauka pemali enggau pelepak.	Pelepa manang udah dibuat laban timpuh pemali udah genap tiga hari.
Temuku tali	i. Tali disintalka dikena ngaga semaya timpuh pengawa (gawai, nyabung enggau ti bukai) dipenyadi. Siti sintal tali nya dibuka tiap-tiap hari nyentuk ngagai timpuh pengawa nyadi. ii. Dikirum tauka dianjung ngagai kaban belayan enggau orang bukai ke dikeberatka ati diambi ngabang tauka dibai enggau besaup ngintu pengawa nya.	“Nyadi penatai aku tu ukai datai ngapa unggal, penatai aku tu mai temuku ke tanda timpuh pengawa melah pinang anak aku,” pia ko Apai Abu nganu Apai Nyuak.
Tambai	i. Tanda rumah mali ditiki temuai (bisi ditinggang penti pemali). ii. Tanda umai mali ditengah udah dipemali. iii. Gerempung daun kayu idup digantung ba pala tangga setak-setak rumah, tisi tauka sukut umai. iv. Kain kanggan sunting kapu gantung ba mua pintu bilik.	Rumah sida Jangga mali ditiki temuai, bisi dituatka sida tambai ba pendai.
Ruding	Rengka main ti digaga ari temaga tauka aping, ditebah ba tangkup mulut dikena bujang enggau dara bejaku pasal pengerindu enggau pangan diri.	Wat Jana landik amat ngaga ruding laban iya selalu enggau apai iya betukang kenyau ari mit suba.
Terantang begau	Pangkung dikena ngemegauka orang sereta lalu minta sah.	Kami serumah begau udah ninga terantang ti datai ari rumah panjai ke enda jauh ari rumah panjai kami.